Zu mia, da Fotografie & meina Gschicht

Griaßeich, 

i bin d'Kathrin und aufgwagsn bine im schena Oberbayern in Sachsenkam auf am Bauernhof, mit allem wos an da Landwirtschaft dazua kead und do bine a sehr dankbar, stoiz und frou drum. Fotografiad hobe scho imma sehr gean, ois Kind hods ogfanga mid na Kinderkamera, späda hobe dann a Digitalkamera kobd, bis schließlich dann de erste profesionelle Kamera kafd woan is. 

Easd hob i imma hobbymäßig vui Landschaft, d'Natur und Vicha fotografiad,

weils ma a rießen Freid gmacht hod und a scheens Hobby wa. Eigentlich bine a gleande Medizinische Fachangestellte und hob na no d Ausbildung zur Landwirtin o gfanga, wo i as Berufsgrundschuljahr erfolgreich obgschlossn hob. Egal ob als MFA oder LW-Azubi, i hob so vui Power und Energie kobd, i bin ofd nembei vui an Stoi und fuad ganga, wa vui mid Freind undawegs, hob mei lem genossen und hib nix o brena lossn. 

Dann hobe 2020 an schwarn Schicksalsschlog kob, da mi im Kuastoi a Kua derartig o bagd hod, dasse easd moi 2,5 Jahr duach den Arbadsunfoi krankgschrim wa. 

Dea oane Dog, de ba Menudn, ham mei ganz Lem verändert, so dass nix mea wa wia davoa und mia so vui gnoma woan is. Nochm Krankenhausaufenthalt und einigen Rehas, hob i a no bis heid so manche Unfallfolgen und Therapien, de mi füa imma begleidn wean.

Es wa ned leichd si wida ins Lem zrug zum kämpfen, voallem wa des schlimmsde Zeit, wo ma einfach nua no aufgem wuid. Häde in dera schwarn Zeit ned so a starke Familie und oanzelne wiagle guade Freind um mi umma und hinda mia steh kobd, kannd i mid Sicherheit song, wa i heid nimma do. Oiso an dera Stell a moi a grouß Danke an olle, de füa mi bedingungslos do warn, mi aufbaud ham, unterstützt und ned henga glossn ham, denn so traurig wias is, aba genau in so na Situation leand ma de ealichn und richdign Freind im Lem kena, de egal wos is an deine Seidn bleim. Zwischenzeitg hod mi des a moi ganz sche valädsd kobd, denn es han a wiagle guade Freindschaften ausananda ganga, wei koa Verständnis füa mei Situation do wa, wei i oafach nimma so fnktioniert hob wia davoa, so wia mi olle kend ham, füa jädn do und imma guad drauf. Ja auf oa moi, hods de Kathrin wia voam Unfoi nimma gem und statt Lem genießen und Party macha hob emid wos ganz andam zum kämpfen kobd. Vo da BG hea wa klar, d'Landwirtschaft is koa Weg mea fü mi, wos da nagsde schlog ins Gsicht wa, denn es wa mei Lem & mei Leidenschaft, ois hod si darum drad. I hob ned nua Dahoam vui mid gweagld, Kia gmoicha, Dragä gfahrn und ois wos so dazua kead, sundan wa z.B. a in vaschienene Vareine aktiv, wa auf Landwirtschaftsmessn mit na Futtertrocknung vertreten, usw.. Bei de Koimbriada wa i in da Vorstandschaft mit dabei und bin gean an sämtliche Veranstaltungen wia, Traktorpulling in Wakendorf, Feldtage in Nordhorn und sämtliche Oltimertreffn mid ausgrugd, hob sogar de Internetseidn dazua erstellt. Aba ned nua des, bis voa meim Unfoi wa i vo gloa auf aktiv bei de Trachtler dabei, bei da Wasserwacht und im Burschenverein am start. Noch meim Unfoi hod si des Schlagartig ois vom oana aufn andan Dog aufkead. Mia is da Bon unda de Fiaß weggrissn woan und es wa nix mea so wias moi wa. 

Es hod lang bruacht bis i mi na einigermaßen dafanga hob, aba des hod na a koasn, dasse mi umorientieren mua und mi vo meim gesamten Leidenschaft zua Landwirtschaft verabschieden und aufgem mua. Füa mi wa klar, a dritte Lehr mache ned a no, sundan wenn na wos, wos mi wida aufbaud, mia hoid und mi wida stärkt. I hob dann a in da Reha in Bad Reichenhall de 8 Wocha genutzt und wa vui mid meim Mo in dera schena Landschaft undawegs. Noch na Zeit hobe na moi ogfanga Postkarten zum design und bestelln. Wore na wida Dahoam wa hod sis so noch und noch ogfanga, dass de Leid im meim Umkreis gsogd ham, uns gfoin deinw Buidl so guad, mächasd du unsa Taufe fotografian. Easd hobe ned so gwussd, obe des macha sui, wei des a nummoi ganz wos andas is wia d'Landschaftsfotografie. Easd is ma a ned so leicht gfoin, denn seit meim Unfoi ware scho lang nimma so unda Leid und hob gar ned gwussd, obe de offene und herzliche Art wida erlangen ko, aba um so froua bine, dasses irgendwia noch und noch gschaft hob, a wida gesellschaftlich am Lem teil zum nehma. 

I hob dann no zusätzlich Fotografiekurse und Seminare in verschiedenste Richtungen gmacht, Erfahrugen in da Praxis gsammelt  und ma schließlich dann a Gewerbe o gmeldet.

 100% arbeitsfähig weade nia nimma sei, denn meine Krenzen han definitiv vui niedriga wia voa meim Unfoi und de Folgen davo wean mi a Lem lang begelidn, aba es is wida a Schritt in de richtige Richtung. Und i bin verstammt stoiz, dase jetz do steh, wo i steh, dasse song ko dea Schicksalsschlog is jetz scho ba Jahr hea und i find irgendwia zumindest a Stück weid duach de Fotografie wida ins Lem zrug. Es wead imma Rückschläge gem und auf und abs, aba wichtig is, ma gibd ned auf und hod Leid um si umma, de oan so nehman wia ma is, a wenns oam ned imma Guad gäd.  

De Fotografie is füa mi a Fensda ins Lem, so wia mei Mo und unsa Bua. 

Erinnerungen füa andere füa imma fesd hoidn zum kena is so wos schens! 

Denn es is wos, wos füa d Ewigkeit bleibt, des ko und koana mea nehma.

A no Jahre danoch schaud ma si z.B. gern d'Hochzeitsfotos o, mim Partner, da Familie aba a Verwandte und Freind. Ma daucht immer und imma wida in de Situationen ei und ko mid am grinsen im Gischt und im Herzen de Momente wida auflem lossn. 

Füa mi is jede Begleitung a wiagle grouße Ehre!